Bier-Forum.ch

Hoi zäme

Letschti hanimi vorem Lehre drückt und imene üsserst erheiterende Gspräch mit em Vince über d Kombination vo Suurchrut u Bier gredt. Suurchrut u Bier chunnt sit eh und je näbenang vor, aber was wenn mers gad mitenang vergärt? D Idee isch eifach: Es Suurbier het Miuchsüüribakterie -- Suurchrut het Miuchsüüribakterie. Passt wie Arsch auf Eimer. Mir hei när es paar Variante düreblödelet u iz lahts mer ke Rueh und drum möchti mau id Rundi frage, mit em Risiko, dass das Thema de is Gott u d Wäut verschobe würdi ...

Im Anfang war das Chrut

• So macht Betty Bossi Suurchrut
• Bier im Suurchrut (im Hotdog) funktioniert
• Untappd kennt Bier wo mit Suurchrut "gsüüret" isch Si hei dert z Suurchrut no mit Mango und Ananas vergore, um em Chrut no e süessi Note z gä.
• Geuse u Gose tönt gliich, isches nid: Zweu Stile wo me chönnt kombiniere?
• Ähnleche Thread im Forum vom grosse Kanton

Was chönnt me aus dritue?

• Chabis
• Malz
• Hefe
• Wasser

à discuter, aber je nach je geil

• Hopfe (nid z viu; Problem für d Lactobaziller, aute Hopfe näh)
• Härdöpfu (weus so schön passt)
• Weize (wie im Geuze)
• Frücht (wie s Sauer'd)
• Gwürz u Chrüter wie Chümi, Koriander, Lorbeer (chunnt is Suurchrut, aber ou zT i anderi Bier)
• Salz (chunnt is Gose)

Procedere

• Suurchrutkulturstarter

Was meinet dir? Heit dir da irgendwie Erfahrige? Hättet dr Luscht, das mau z probiere? Müesst no öppis anders dri? Vince, steit dis Agebot no vom aute Gärtank? (i ergänze eifach de mau no, was no so fäut)

Cheers, F

Dä mitem Härdöpfu hani grad letsthin mit em Tinu vo Jensitzer beredet. Isch zwar nid ihne passiert, aber anere Braubekanntschaft, wo äbe es Härdöpfubier het braut. Dert hets es grosses Problem, dass z viu Sterchi vom Härdöpfu im Bier landet. Bi leider zweni Biochemiker, aber we me dere Sterchi schiins gnue Zit laht, verwandlet si sech mit de Zit zu Acetat oder Aceton. Schiins schmöckt das Härdöpufbier mittlerwile zimlech ähnlech wi Nagulack-Entfärner.

Mi aut Gärtank hockt no bi mir ufem Baukon

Ha mau es Rezäpt usem Arm gschüttlet:

1.5kg Pale Ale Malz
0.5kg Cara Hell
0.5kg Weizenflocken

5g Sauz bim Maische

10g Saazer Hopfe (60min)

Letste 10min Choche:
10g Koriander-Saame
10g Chümmi
10g Wacholderbeeri

Zum fermentiere:
500g unpasteurisierts Suurchrut
1pk MJ's Belgian Wit (eifach für d Gährig z ungerstütze)

Stammwürzi: 1.050 SG / 12.5 ° Plato
Endzucker: 1.006 SG
Alkohol: 5.8 %
IBU: 9
Farb: 7 SRM / 14 EBC